شمس الاصيل - بيرم التونسي

قصيدة شمس الاصيل
شمس الأصيل دهبّت
خوص النخيل يا نيل
تحفة ومتصورة
فى صفحتك يا جميل
لو الناي على الشط غنى
و القدود بتميل
على هبوب الهوا
لما يمر عليل
يا نيل أنا واللي أحبه
نشبهك بصفاك
لانت ورقت قلوبنا
لما رق هواك
وصفونا فى المحبه
هو هو صفاك
ملناش لا احنا ولا انت
فى الحلاوه مثيل
انا وحبيبى يا نيل
نلنا أمانينا
مطرح ما يرسى الهوى
ترسى مراسينا
والليل إذا طال و زاد
تقصر ليالينا
واللى ضناه الهوى
باكى و ليله طويل
انا وحبيبى يا نيل
غايبين عن الوجدان
يطلع علينا القمر
ويغيب كأنه ما كان
بايتين حوالينا نسمع
ضحكة الكروان
على سواقي بتنعى
ع اللى حظه قليل
يا نيل

قصيدة رائعة لشاعر عملاق
شكرا لإدارة الموسوعة على هذا الجهد
أعانكم الله ووفقكم للإرتقاء بالشعر والشعراء

» عتاب - بيرم التونسي
» الحب كده - بيرم التونسي
» القلب يعشق كل جميل - بيرم التونسي