إنـــذار - الشاعرة فاتن شوقي . مصر

( إنــــــــــذار )
الحُب اللّ.. متحوش جوايا
و كان مالي الرُوح
عماااااال بيروح
يتسرسب مع بُعدك عنّي
مش قادر يملا .. كل مسافات البيْن
كان نن العين
والذكرى بسلاحها الوردي...
أُدامي تعدّي
وتحلّي في بُقي المُر
تتحدى كل شروخ العمر
( جوابات وورود
وقصايدووعود)
صبحت أشواق....من جمرْ
شعللت الصبر في قلب حشايا
قلبت لي الآية
ماخلاص..
القلب اللّي بيُنبض صابه الوعكات
وفاضله شوية واقولك.. ماااات
بينادي .. على حسّكْ ..
علشان تديّله حياه
والطير.. بيشّدك
على طووول وياه
بتطير.. و ترفرف
وتسيب النبض يجف
وشريط الحب أمامي ....يسف
خَلصت أغانيه الحلوة
والذكرى..
محتاجة للحظة ذكرى
تروي شقوق البهتان
وزمان..
مش ممكن يرجع تاني
وسيادتك...
ولا حاسس ...ولا عندك فكرة
بتأجّل كل حنين...
وتقول.. بعدين... بعدين
تلقاه..
اتّخمر داخل رُوحك
اتّحجر جوه متاهة شوكك....
لسنين
ولا هاقدر اصّدق
إنه في يوم ممكن
هايدوب
وانا عاوزة ... يا دوب
أوقات... لحظات ..مليانة حنين
تصالحني..وتحارب أي أنين
"كيوبيد".. غلبان
صابه الهذيان
صار فيّا عجوز
أنا نفسي سهامه ف قلبي تفوز...وتزيد...
و تلّون عتمة روحي
بلون العيد
وأحس في حبي براحة بال
في الحال
و سوال؟؟؟
ليه لازم عندك دايما بكرة...
ولا فارقة معاك
تحويشة الحب ..ِ
أو ماضي ..
أو حتى العشرة؟!ِ
(فاتن شوقي)

» الشاعرة فادية سابا بَربَر Fadia Saba Barbar
» الشاعرة إيمان محمود محمود قاسم . مصر