الشاعر رمضان محمد رمضان سليمان . مصر

الشاعر رمضان محمد رمضان سليمان . الجنسية مصري . يقيم في مصر
مواليد يناير ١٩٨١ بقرية الزهايره..مركز السنبلاوين.. محافطة الدقهليه..
حاصل علي بكالوريوس تربيه جامعة الازهر
لاعب منتخب مصر للملاكمه ( لجنة الكيك بوكسينج ) من ٢٠٠٢حتي ٢٠٠٦
انتقل من اللعب في مستوى الهواه الي المحترفين من ٢٠١٢حتي ٢٠١٧ ..
ارتبط بالشعر والكتابه منذ الطفوله فكان يقلد والده في الكتابه وكانت احدى هواياته أن يعد خطابات أحد الأصدقاء الذي يشغل منصب عضو مجلس الشورى
وله بعض المواقف السياسيه مثل ضرب العراق 1996 . وشارك في اعتصام جامعة الأزهر علي نشر كتاب وليمه لأعشاب البحر للكاتب السورى حيدر حيدر
إضافة الي عاطفة الشباب والحب العذرى وما يوحي من معاني ومفردات
كان عضوا بنادي أدب السنبلاوين في الفترة ١٩٩٧حتي ٢٠٠١ ولأسباب الدراسه ووفاة والده ابتعد عن الوسط الأدبي فترة ولجأ إلى وسائل التواصل الاجتماعي وتعرف علي رابطة شعراء العاميه٢٠١١ تقريبا فايقظ ما ظن أنه قد فارقه للأبد فامسك بقلمه وعاد للكتابه فأنتج ونشر (كلام فنجان ) و ( مع نفسي ) أشعار بالعامية المصرية
دار النيل والفرات للنشر والتوزيع
وله ديوان تحت الطبع بعنوان ( درويش ) أشعار بالعامية المصرية
,,,,
من أشعاره
1 ( كلام فنجان )
ما تيجي نكمل القصه
ونقرا الكف والفنجان
طريقك ببتدي لسه
وخدتي الدرس بالمجان
هربتي ف أول الحصه
جابولك رقوه ضد الجان
قالولك حاسبي م الخسّه
وم الحيله وم الجدعان
فقلتي ف سكتك مرسى
وبحرك مزرعة مرجان
وصلتي السكه متأخر
لبستي لنفسك الفستان
وغنيتي ياريت انسى
هويتي البُعد والتحنان
وحبك جرحك المفتوح
وجع مايع ملوش وجدان
وهمسك لمسك المسموح
بريشة قلبك التعبان
مفيش ألوان
مفيش غير القرار عنوان
في أخر سكتك موال
حروفه بتلعن المكتوب
وإيه مكتوب
أمل محبوس ومتكتف
ملل مدسوس على الأُرْفُف
وإيه دا كمان ؟
طلاسم حلمك المغتال
عملها عزول
طلوع ونزول
وخير بيزول
مفيش غير الفراق على طول
عمل معمول
تعيشي الوهم والترحال
ولايهدي لولادك بال
خلاص خلصت بشؤم الفال
يابنتي اتوضي وارتاحي
هاتنسي القصه واللي اتقال
كلام فنجان
--------------------------------------
2 ( مع نفسي )
وبقابل نفسي بدون م احتاج
علشان مش واخد ع المواعيد
عيان وصفولي الحضن علاج
وهاجيبه منين والقلب وحيد ؟
ومراية الحب العميانه
ساقياني المُرّ وعطشانه
من غير ما توقف ولا دمعه
عمري م حسيتك يوم سامعه
لاهياني الشمعه السكرانه
مع ضيّ الفجر على البرواز
خلقت حدوته بطلها مجاز
وسؤال متكرر مسألتوش
وجواب متأكد إنه فشوش
ولا أيها حضن علاجه جواز
متسعّر ختمه بكام ملطوش
أنا قابل نفسي ولىّ مزاج
اسمع حواديت شمعه وخلصت
وامنع احاسيسي اللي اتحبست
واتجنن واضحك على نفسي
وماحسش تاني لو اتكسرت
مش عيب على فكره ان أنا مخدوع
ولا حلمي ف بكره يكون ممنوع
كل الموضوع ؟
اطلع مع نفسي بدون عكاز
مش كسر قزاز مغسول بدموع
ولا قلب بتاج وحنين مقتول
ولا حضن بخيل وقت ما يتعاز
يهرب ويسيبني لنفسي ملاذ
يهرب ويسيب شرخ البرواز
--------------------------------------
3 ( وحشاني ياامه )
بقالي زمان وانا مهموم
كلام خلصان. ملهش لزوم
ومش غلطان.
ومش لاقي لكلامي مكان
قالوها زمان
.(ياشوم الشوم) على المحروم
وع الحافي اللي شبعان نوم
أنا بحبل الوداد عايش لكن معدوم
بداية القول أنا وامي
بحبلي السري متغمي
أنا والفرح متخاصمين
بقالنا سنين
على دا الحال
وعندي عيال .
وبيت واسع
بنيت جامع وماشي يمين
..وخط السير ولا غلطه
وقلبي أسير ودي الورطه
وحشني الحضن يا امايا
ماسيبتش شبر ع الخارطه
مكلمتوش
سجين الماضي يا امايا.
وبقيت مرووش
وحشتيني يا جنه ونار
يومين ف الشهر مايكفوش
بخاف مايجوش .وتفضا الدار
يا خير وعمار
وحشتيني _مبوحشكيش ؟
خلاص يا أمه بقيت درويش
لا بتأخر لنص الليل على القهوه
ولا باسهر ف عز البرد واستهوي
واجيلك لاجل أنام ....وادفا
وأقوم واصحى على الدعوه
وحشتيني...'
وحشني الحضن باللهفه
قدرتي تغيبي عن نفسك ؟
وتنسى ان انتي مستشفى
يا حقنة روح بتستعفي
ووزنة حب بالكفه
وحشتيني
وحشتيني بدون غيبه
يا بحر العطف والطيبة
يا جنه ورنه جوايا
ومهما كبرت مش عيبه
أقول يا أمه وحشتيني...
يا سجن وحضن ومرايه
ما تيجي تعيشي ويايا
يا تاخدي ثواب واموت فيكي
وتغسلي روحي بايديكي
ويفضل حضنك العامر مدفيني
في حضنك مش هاقول فيني
وسيبي الكحل ف عنيكي
وبلاش م الدمع ....
واحده وبس تكفيني
تسيب ريحتك يا أغلى ملاك
تجيب سيرتك لابويا هناك
تونسنا .. وتحكيلنا
وتشفعلي وتدعيلي ..
وليه يا أما وحشتيني

» الشاعر عنتر محمد ضيف - مصر
» الشاعر مصطفي بيبرس
» الشاعر معوض حلمي على - مصر
» الشاعر آسو شيخ كمال - العراق
» الشاعر خالد اغباريه - فلسطين