الشاعر مصطفي بيبرس - مصر - قصيدة أبي

قصيدة أبي
تغيب عنا وتهجرنا
وبتبعد مسافاتك
وترحل زي طيف شارد
وليل باعد
مخاصم كل أقماره
وزواره خيال مارد
ونور مخضوض
وزيف ساكن حنايانا
وشمس كبيره جوانا
مابتدفي في ليل بارد
لابتنور ولا تضوي
ولاتشفينا م الأوجاع
فؤادك ع البعاد قادر
وأنا وقلبي لنظرة عين
وحضن يلملم المكسور
يابويا جياع
بدور ع اللي ساكني
وافتش فيا علي ذاتك
مابلقاني ولابلقاك
مابعدت عنا مسافاتك
وقربك ضاع
وعمري ماع
وقلبي مهما طال بعدك
مايوم ودك يابويا باع
أنا نبضك ولو قلبي ماهوش قادر
وانا الصابر وانا الساكت
وانا المقتول علي بابك
رحلت بعيد لكنك ليه جوايا
بشوفك كل يوم ناضر
وحاضر وسط أحبابك
ولو كان القدر بإيدي
لاحايل الموت
واهديك الخلود وحدك
وقطر الموت ده كان سابك
وكنت تدوم
انا بعدك فارقت الفرح
وقلبي من الحنان محروم
وابات مهزوم علي صورتك
علي صوتك في وجداني
بتدبل فيا أفراحي
وتطرح فيا احزاني
شقا وهموم
يفوت اليوم
واشوف الدنيا بعنيا
ضلام كاحل وليل عتم
واشوف الدنيا حواليا
بعين طفل اتخطف عمره ومتيتم
تكبرنا الحياه بالسن
وأنا بالحزن بتهدم
وبتبدد
طفولتي من من سنين عدت
لاهي خلصلت ولا اتمدت
ولاشايف في كوني حياه
وفيا الهم يتجدد
وبحر الحزن يتمدد
وليل فاقد يابويا ضياه
يابويا الليل ماهوش رحمان
ولا لقيت في الوجود طيبه
ياحضن كبير وكله أمان
حياتي وهم متبعتر وتكديبه
وليل طارح وجع ودموع
حياتي شموع
بتطفيها دموع نازله علي خدي
ومين حبك ومين حسك
ومين باكي عليك قدي
يانبع النور
جميع الشاهدات تشهد
بإني يابويا حبيتك
يشهد عليا النن
ودموعي وجوارحي
ليلة مافارقتنا
فيها اتولد جرحي
كل الدنيا يابويا في كفه
وانت في كفه
بلقي الوحده في وسط الزفه
والمح حزني بيسكن فرحي
يا كل آه إبنك وتاه
وسط دوامة رياح
بعدك وأصبح مستباح
والحزن أهو واخد مداه
والفرح راح
ساحب أنين الروح معاه
والبحر موجه ماعادش هادي
البحر عاتي
خد في جوف أمواجه عمري
وقلبي انا في غموضه تاه
وهنشكي مين وهنشكي ليه
حامدين وشاكرين الإله
علي كل شئ جوايا صابر
علي كرب واصل منتهاه
انا بس بحكي عن حياتي
وبرغم كل البعد يابا
لسه بستناك ليلاتي
لسه اوضتك فيها ريحتك
لسه روحي حاضنه بابك
لسه قلبي الدافي دامع
والدموع تحسب غيابك
___________
قصيدة طرف نور
الصوره بتزيل الضجيج
م اللي كان جواها ساكن
والاماكن
من بعيد بتبان كسور
طرف نور
نّور وقاد الكون بصيص
خلي ضي الشمس سور
وانتحاب الليل ونيس
يحجب النور من واديه
تلتقيه يوم حب غيره
والتقي غيره في واديهِ
والشمس قالت ودعيه
مدي ايدك واحدفيه
تحت قضبان الحياه
بعد صرخه بعد صوت
ان بعد الحب موت
حتمي لازم تلتقيه
فين المفر
مين اللي فر
من حب كان اخره وجع
والحب مر
والشاب م العشق اتلسع
طول عمره شايف كونه وادي
واشمعنا ليه بس ليه بس الليلادي
كونه ضاق ومش اتسع
نزل الغريق في بحر حبك
واتاريه ياحور غرقان في خُبك
وانتي ع الشط تلاغيه
بس ليه كان ذنب حبه
نار في قلبه
من مرار قربك هاتيه
ياما قولتيله هكونلك حضن دافي
لو في يوم عاند زمانه
هنحني يطلع كتافي
يلمس النجمه بإيديه
رسمتي ليِه في الحضن جنه
من فرحته شمر وغني
خدتيه معاكي لبحر تيه
وشمتي فيه
لما يوم بهتت عيونه
هو راهن عمره ليكي
وانتي قلبك عاش يخونه
هو خبط ع البيبان
هو بعد الهجر شاخ
هو ليه الحب هان
والزمان في عيونا باخ
والسلام علي كون لئام
حد نام فارد ايديه
وحد عام في دموع عنيه
وحيد بينزف ذكريات
واللي كان صعبان عليه
حب جوه ضلوعه مات
والاخير بالآه يعيش
تسأله علي حاله مالُه
يبتسم ويقول مفيش
مالقهوه قوت الموجوعين
والغرقانين في بحور وجع
أصل الوجع لو كان ودع
ماكان يصيب ابدا جدع
ف متضحكيش علي عود هِزل
ولاحد عمره مايوم يوم فِرح
اصل الزمان طبعه رِزل
ولا عنده حاجه بتتنسي
لو كان صحيح قلبك قِسي
ف من الزمان راح ينجِرح...
——————-
ولسه بتسامح
وياليل ماليه الوجع
والروح مافيها براح
قلبك رقيق واتوجع
والكل عنك راح
والشعر مش ستار
الشعر قول فضاح
كتبت ليه الشعر
وسردت أحداثك
قلمك ماصان السر
فضحك قصاد ناسك
ياللي انت زي الورد
حتي الرحيق داسك
وفضلت متعشم
في الخلق والمواويل
من جوه متهشم
من بره كالمعاديل
عديت سنين صعبه
أقسي مافيها الليل
صاحبت كل الوجع
وبكيت علي روحك
طبطبت ع الواجع
وسبحت في جروحك
ونسيت تداوي الألم
وتخف ياطيب
قلب عليل ماسلم
ولا جرحه متطيب
قلبك برئ وانظلم
في الهم داعيينه
في الفرح متغيب
وحدك أسير همك
ومالكش فيه صاحب
دمعك محاه دمك
جرح الحبيب ساحب
لسنين مافيها شمس
عاتم ياليل البعد
والضي مطموس طمس
حيلك مابان ميلك
أعظم صراخك همس
كل اللي جالك ضيم
ولا حتي بتصارح
شايف سنينك غيم
من قلبها الجارح
عايش مع المظاليم
ولسه بتسامح

» الشاعر مصطفي بيبرس - مصر - قصيدة طرف نور
» الشاعر مصطفي بيبرس - مصر - قصيدة ولسه بتسامح
» الشاعر مصطفي بيبرس
» قصيدة ( موت العـشاق ) LA MORT DES AMANTS - شارل بودلير Charles Baudelaire
» الشاعر عنتر محمد ضيف - مصر